Վրաց-աբխազական պատերազմ: Աբխազահայերի դրությունը, օգոստոս, 1992թ.

1992թ. օգոստոսին սկսված վրաց-աբխազական պատերազմը և աբխազահայության անելանելի դրությունը նույնպես շարունակում էր մնալ հայ հասարակության մտահոգության կենտրոնում:

Երկիր, 28 օգոստոսի, 1992թ.
Հայաստանի յոթ կուսակցությունների «Ազգային դաշինք» միավորումը խորը անհանգստություն է հայտնում Աբխազական հանրապետությունում զինված բախումների և բռնությունների ծավալման կապակցությամբ:

... Մեր պարտքն ենք համարում կողմերի ուշադրությունը հրավիրել հատկապես այն հանգամանքի վրա, որ նմանօրինակ հակամարտությունների ժամանակ ամենից շատ տուժում է խաղաղ բնակչությունը: Հայաստանի ժողովուրդը անհանգստությամբ է հետևում դեպքերի զարգացմանը:
... Մեզ մոտ խիստ տարակուսանք և զայրույթ առաջացրեց հակամարտության գոտու հայ բնակչության նկատմամբ կիրառված բռնությունների փաստը: Կարծում ենք` նման փաստերը կարող են անտեղի լարվածություն ստեղծել հարևան ժողովուրդների հարաբերություններում: Կոչ ենք անում հակամարտող կողմերին զերծ մնալ ուժի միջոցով հարցին լուծում տալու փորձերից և նստել բանակցությունների սեղանի շուրջ:

Վրաց-աբխազական պատերազմ, օգոստոս 1992թ.

Կովկասյան տարածաշրջանում 1990-ականների սկզբի արյունալի իրադարձություններից մեկը վրաց-աբխազական պատերազմն էր: Դեռ խորհրդային պետության արշալույսին Աբխազիան, Ստալինի հերթական կամայականությամբ, դառնում է ինքնավար հանրապետություն` Վրաստանի կազմում:

Գորբաչովյան վերակառուցումը հնարավորություն է ընձեռում աբխազներին Վրաստանի կազմից դուրս գալու պահանջ բարձրացնելու համար: 1989թ. մարտին այդպիսի որոշում է ընդունում աբխազ ժողովրդի համագումարը: Հուլիսին Սուխումում վրացիների և աբխազների միջև առաջին բախումն է տեղի ունենում: